ajab uljhan bhare din haiN wajah jani nahiN jati
humari bekrari, unkii hairaani nahiN jati.
kabhi taariiq goshoN se suni thi ik sadaa humne
huii muddat magar dil se pareshani nahiN jati.
bhari basti meiN bhi halat kharaabe se nahiN kamtar
humare ghar se aakhir kyoN ye veerani nahiN jati.
akela huN yahaaN mere siva koii nahiN rehta
yahaaN tanhaiyoN ke rukh se taabaani nahiN jati.
khasaara hi khasaara apne hisse meiN chalaa aaya
kabhi taqdeer ke qatib kii manmani nahiN jati.
lipat kar phool se roti rahi titlii bagheeche meiN
shikaayat thi ki rango-boo se uriyani nahiN jati.
panaheN maaNgne wale musalsal baRh gaye, lekin
mahal ke band darwazoN se arzaani nahiN jati.
na jane kaun-si mitti se rab inko banaata hai
faqiri meiN bhi mazdooroN ki sultani nahiN jati.
humari chashme-tar pe rakh gayaa hai waqt wo chashma
‘bahut jani huii surat bhi pehchani nahiN jati.’
michauli ke liye usne kabhi aaNkhoN pe baNdhi thi
mere khawaaboN se ab tak wo chunar dhani nahiN jati.
humare aaj se behtar naii nasloN ka kal hoga
bhale nasaaz hoN haalaat imkaani nahiN jati.
abhi din-raat haiN pal-pal farozaaN dheroN yadoN se
akela chhoRkar mujhko ye tugiyani nahiN jati.
use kab hosh hai iskaa kahaaN dil rakh diya lekar
sitamgar kii, muhabbat meiN bhi naadani nahiN jati.
mere khawaaboN ke sehra meiN chale aao, chale aao
baRaa purkaif aalam hai ki laasaani nahiN jati.
kabhi hai meer ka pehlu, kabhi ghalib mehkate haiN
ziyada door ghazaloN se nigehbaani nahiN jati.
