اُجڑے ھُوے لوگوں سے گریزاں نہ ھُوا کر

اُجڑے ھُوے لوگوں سے گریزاں نہ ھُوا کر

حالات کی قبروں کے یہ کتبے بھی پڑھا کر

ہر وقت کا ہنسنا تجھے برباد نہ کردے

تنہائی کے لمحوں میں کبھی رو بھی لیا کر

اے دل تجھے دشمن کی بھی پہچان کہاں ھے

تو حلقہء یاراں میں بھی محتاط رہا کر

کیا جانئے کیوں تیز ہوا سوچ میں گم ھے

خوابیدہ پرندوں کو درختوں سے اڑا کر

اس شخص کے تم سے بھی مراسم ہیں تو ھوں گے

وہ جھوٹ نہ بولے گا مرے سامنے آ کر

پہلا سا کہاں اب مری رفتار کا عالم

اے گردش دوراں ذرا تھم تھم کے چلا کر

اک روح کی فریاد نے چونکا دیا مجھ کو

تو اب تو مجھے جسم کے زنداں سے رہا کر

اب ٹھوکریں کھائے گا کہاں اے غم احباب

میں نے تو کہا تھا کہ مرے دل میں رہا کر

برھم نہ ھو کم فہمی ء کوتاہ نظراں پر

اے قامتِ فن اپنی بلندی کا گلہ کر

اس شب کے مقدر میں سحر ہی نہیں محسن

دیکھا ھے کئی بار چراغوں کو بُجھا کر  

Be a Fan